जापानद्धारा नेपालबाट १४ तारिख मध्यरात देखी प्रवेशमा प्रतिबन्ध, जापान आउने उपाय यस्तो हुनसक्छ

 

टोकियो, जापान ।

जापान सरकारले संक्रामक कोरोना भाइरस जोखिमको कारण नेपालबाट जापान प्रवेशमा प्रतिबन्धको घोषणा गरेको छ ।

यहाँको परराष्ट्र मन्त्रालयका अनुसार नेपाल सहित ईण्डिया र पाकिस्तानबाट जापान प्रवेशमा मे १४ तारिखबाट प्रतिबन्ध लगाईएको छ । सरकारी सूचना अनुसार प्रतिबन्ध शुक्रबार मध्यरातबाट लागू हुनेछ ।

प्रतिबन्ध लागू भएपछि नेपालबाट जापान सैद्धान्तिक रुपमा प्रवेश पाईने छैन । यदि 'रि ईन्ट्रि' वा नयाँ भिषा भएपनि जापान आउन रोक लाग्नेछ । तर जापानी नागरिकको हकमा भने यो प्रतिबन्ध लागू हुनेछैन ।

जापान सरकारले विगत दुई हप्तामा नेपाल, ईण्डिया र पाकिस्तान भ्रमण गरेका बिदेशीहरुलाई पनि प्रवेशमा रोक लगाएको छ । ईण्डियामा दैनिक ४ लाख सेरोफेरोमा र नेपालमा ९ हजार भन्दा बढी कोरोनाका बिरामी थपिरहेका छन् ।

सीमा उपायहरु सुदृढ गर्ने क्रममा यस्तो घोषणा गरेको जनाउँदै जापानले आफ्ना नागरिकहरुले देश प्रवेश जारी राख्न सक्ने जनाएको छ ।

 

  यस्ता छ उपाय

जापानले नेपाल सहित तीन देशबाट प्रवेशमा रोक लगाएपनि नेपालबाट तेस्रो मुलुक अर्थात् जापानले प्रतिबन्ध नलगाएको देश हुँदै भने नेपालीहरु जापान आउन सक्नेछन् । तर यसको लागि नेपाल छाडेको १४ दिन पुरा गर्नुपर्नेछ ।

 

नेपालबाट जापानले प्रतिबन्ध नलगाएको देशमा १४ दिन बिताएर पुन उक्त देशमाथि जापानले लगाएको नियमानुसार पीसीआर परीक्षण लगायतका प्रक्रिया पुरा गरेपछि भने जापान आउन सक्नेछन् । त्यस्तो अवस्थामा उक्त देशबाट जापान प्रवेश गर्दा अपनाउनुपर्ने क्वारिन्टिन लगायतका नियम पालना गर्नुपर्नेछ ।

प्रतिबन्धका वावजुत यो उपाय देखिएपनि नेपालले अन्तर्राष्ट्रिय उडानमा लगाएको रोकका कारण यो त्यति सहज भने देखिन्न । यसको लागि चार्टड उडान वा विशेष उडान हुने जापानले प्रतिबन्ध नलगाएका देश पुगेर आउनसक्ने कठिन उपाय मात्र बाँकी रहेको छ ।

जापानले हाल लगाएको प्रतिबन्ध कहिले खुल्छ भन्ने कुरा नेपालमा कोरोना संक्रमण नियन्त्रणको अवस्थामा भर पर्नेछ । नेपालमा फैलिएको संक्रामक भाइरसको महामारी अवस्था हेर्दा कम्तिमा १ महिना यो प्रतिबन्ध खुल्ने सम्भावना न्युन रहेको छ ।