जापानले बिदेशी यात्रीका लागि प्रबेश खुकुलो पार्न थाल्यो

 

टोकियो, जापान ।

विश्वभर कोरोना भाइरस विरोधी खोप लगाउने मानिसको संख्या बढिरहेको छ र कोरोना भाइरस संक्रमितको संख्यामा पनि कमी आइरहेको छ । यस्तोमा जापानले पनि न्यूयोर्क समेत केही अमेरिकी राज्यका साथै यूरोप र मध्य पूर्वबाट आउने यात्रीका लागि क्वारन्टिनका उपायहरु खुकुलो बनाउन लागेको छ ।

यी परिवर्तनहरु बिहिबारदेखि लागू हुनेछ । अहिले कोरोना भाइरसको डेल्टा भ्यारिएन्टको संक्रमण बढिरहेका क्षेत्रहरुबाट आउने यात्रीको लागि भने क्वारन्टिनका उपायहरु कठोर पारिएको छ । सो भ्यारिएन्ट पहिलो पटक भारतमा देखा परेको थियो ।

बिहिबार देखि चेक गणतन्त्र, हंगेरी, लेबनन र ६ अमेरिकी राज्य (कनेक्टिकट, इओवा, मिचिगन, न्यूयोर्क, र्योदे टापु र टेनेस्सी)बाट आउने यात्रीहरुले जापान छिर्ने बित्तिकै सरकारले निर्दिष्ट गरेको स्थानमा क्वारन्टिन बस्नु पर्ने छैन । अहिलेसम्म भने यी क्षेत्रहरुबाट आएका मानिसहरुले तीन दिन क्वारन्टिन अधिकारीहरुले तोकेको स्थलमा बस्नु पर्नेछ अनि बसाईको अन्तिम दिनमा संक्रमण परीक्षण गर्नु पर्नेछ ।

पछिल्लो परिवर्तनको अर्थ यी क्षेत्रहरुबाट आउने यात्रीहरुले १४ दिनको क्वारन्टिन अवधि घरमा वा आफूले रोजेको अन्य स्थानमा बिताउन पाउनेछन् । यद्यपि, उनीहरुले आफ्नो स्वास्थ्य अवस्था र कहाँ छु भन्नेबारे भने जानकारी दिइरहनु पर्नेछ । दक्षिण अफ्रिका र अमेरिकाको अर्कान्साससमेतका नौ क्षेत्रलाई भने उच्च जोखिम युक्त क्षेत्रको सूचिमा राखिएको छ ।

बिहिबारदेखि यी क्षेत्रहरुबाट आउने यात्रीहरुले तीन दिन सरकारले निर्दिष्ट गरेको ठाउँमा बस्नु पर्नेछ अनि जापान छिरेपछि दुई पटक परीक्षण गराउनु पर्नेछ । यस सूचीमा राखिएका अन्य देशमा ब्राजिलको पाराना राज्य, इष्टोनिया, क्रिगस्तान, पेरु, पोर्चुगल, स्वीडेन र संयुक्त अरब इमिरेट्स छन् ।

 

सरकारले तोकेको स्थलमा क्वारन्टिन बस्नु पर्ने नियम हाल २९ देश तथा क्षेत्रमा लागू छ । यद्यपि, बसाईको अवधि र परीक्षणका क्रममा फेला परेका संक्रमितको संख्या भने जापान आउनु अघि उनीहरु कहाँ गएका थिए सो आधारमा फरक फरक छ । सबैभन्दा कठोर खालको नियम भारत र नेपाललगायत यसका छिमेकी देशहरुबाट आउने यात्रीमा लाग्नेछ । यसमा विदेशी नागरिकहरुलाई पूर्ण रुपमा प्रवेश प्रतिबन्ध छ भने जापानी नागरिकहरु भने सरकारले निर्दिष्ट गरेको ठाँउमा १० दिनसम्म क्वारन्टिनमा बस्नु पर्नेछ ।

बसोबासको लागत र खानपिनको खर्च सरकारले बेहोरिदिनेछ । खोप लगाएको भएपनि यी देशबाट आउने यात्रीहरुले आउने बित्तिकै कोरोना भाइरसको परीक्षण गर्नु पर्नेछ अनि देशमा प्रवेश गरेको १४ दिनसम्म आफूहरुलाई सेल्फ आइसोलेट गर्नु पर्नेछ ।