जापान ४४ खर्ब येन बराबरको विशेष खर्च योजना बनाउंदै

 

टोकियो, जापान ।

जापान सरकारले बुधबार आर्थिक वर्ष २०२२ का लागि बजेट अनुरोध सम्बन्धी निर्देशिका जारी गरेको छ । यसमा कम्तिमा पनि ४४ खर्ब येन बराबरको विशेष खर्च योजना स्थापनाको योजना पनि छ । यो कार्बन उत्सर्जन कटौतीलगायत क्षेत्रका लागि हुने बताइएको छ ।

सरकारी एजेन्सीहरुले अगष्टको अन्त्यसम्ममा आगामी अप्रिलदेखि शुरु हुने आवका लागि बजेट अनुरोध बुझाइसक्नु पर्नेछ । अनुरोध गरिने कूल रकम लगातार आठौं वर्ष पनि हजार खर्ब येन नाघ्ने अपेक्षा गरिएको छ । सामाजिक सुरक्षामा खर्च स्वतः ६ खर्ब ६० अर्ब येन बढ्ने अनुमान गरिएको छ । वृद्ध नागरिकहरुको मेडिकल र नर्सिङ खर्च बढेर उच्च स्तमा पुग्ने अपेक्षा छ ।

सामाजिक सुरक्षा खर्चको लागि सरकारले आव २०२१ अन्तर्गत विनियोजन गरिएको ३३७ खर्ब येनभन्दा धेरैको रकमको लागि अनुमति दिने भएको छ । कोरोना भाइरसको राहत उपायहरुमा खर्चका कारण वित्तीय अवस्था खस्किँदै गइरहेको समयमा सरकारलाई प्राकृतिक वृद्धिमा कटौती गर्न चुनौती भइरहेको छ ।