खुशीको संकेत ! जापान कोरोनाको खोप लगाएका सबैलाई प्रवेश खुलाउने यस्ताेछ तयारी,

 

टोकियो, जापान ।

जापान सरकारले कोरोना भाइरसको संक्रमण विरुद्ध खोप लगाएका सबैलाई जापानमा प्रवशे खुलाउने तयारी गरिरहेको छ । स्थानीय समाचार संस्था निक्केईले यसबारे समाचार छापेको हो । समाचाअनुसार प्रवेश प्रतिबन्ध लगाइएका देशहरुबाट पनि कोरोना विरुद्ध खोप लगाएका सबैलाई प्रवेशको अनुमति दिइनेछ ।

जापान र अमेरिका दुबै देश खोप लगाएकाहरुलाई प्रवेश खुलाउन तयार छन् । तर प्रवेशको अनुमति पाएपनि यात्रीहरुले १४ दिनको अनिवार्य क्वारन्टिनको नियम भने पालना गर्नु पर्ने समाचारमा भनिएको छ । जापान प्रवेशपछिको आवश्यक व्यवस्थापनको काम स्वास्थ्य तथा श्रम मन्त्रालय, कानून मन्त्रालय मातहतको अध्यागमन विभाग र विदेश मन्त्रालयले गर्नेछन् ।

बेलायतले पनि जापानसहित २० देशका नागरिलाई कोरोना भाइरसको परीक्षण नकारात्मक आएको प्रमाणपत्र देखाएर प्रवेश गर्न दिने समाचारमा भनिएको छ । अमेरिकामा हालैका दिनमा कोभिड विरोधी पूरा खोप लगाएकाहरुलाई पनि संक्रमण देखिएकोतर्फ औंल्याउँदै पूरा खोप लगाएपनि संक्रमण नियन्त्रणका उपायहरु अपनाउनु पर्नेमा जापानले जोड दिएको छ ।

पछिल्ला केही दिन यता जापानमा कोरोना भाइरसको संक्रमण बढेको छ । राजधानी टोकियो समेत केही प्रिफेक्चरमा ओलम्पिक्स चलिरहँदा संक्रमण दिनँहु कीर्तिमानी स्तरमा उक्लिरहेको छ ।