फेब्रुवरी १३ तारिखबाट नेपालबाट जापान आउदा एयरपोर्टमा अनिवार्य ६ दिन आइसोलेसन बस्नुपर्ने

 

टोकियो, जापान ।

 

नेपालबाट जापान आउदा अब एयरपोर्ट अध्यागमनले तोकेको आवासमा अनिवार्य ६ दिन आइसोलेसन बस्नुपर्ने भएको छ ।

 

हाल रहेको तीन दिनको आइसोलेसन अवधिलाई बढाएर जापानले ६ दिन बस्नु पर्ने नियम बढाउने निर्णय गरेको हो ।

जापानमा कोरोना संक्रमणको दर बढिरहेको सन्दर्भलाई ध्यानमा राखेर जापान सरकारले फेब्रुवरी १३ तारिख आइतबार राति १२ बजेबाट यो नियम लागु गर्न लागेको जापान सम्बन्धी जानकार जिज्ञानकुमार थापाले जानकारी दिनुभयो ।

थापाका अनुसार जापान सरकारको क्वारिन्टिन सम्बन्धी परिवर्तन हुन लागेको नियमानुसार नेपालबाट जापान प्रवेश गर्ने यात्रुले जापान आएको ३ दिन र ६ दिनमा पिसिआर परिक्षण गर्नुपर्नेछ । सो रिपोर्ट नेगेटिभ आएमा आफ्नो आवासमा जान पाउने छन । आवास गएर भने मात्र १ दिन होम आइसोलेसन बसे पुग्नेछ। तर दिनको गणना हुदा आएको दिनको गणना भने नहुने भएको छ ।

 

जापानको राजधानी टोकियोमा प्रत्येक ८०० जनामा १ जना कोरोना संक्रमित देखिएको तथ्य सार्वजनिक भएपछि सरकारले आगन्तुकहरूको क्वारिन्टिन नियममा थप कडाइ गर्न थालेको छ । देशभरिमा फेब्रुवरी ९ तारिखको तथ्यांक हेर्दा औसत रूपमा दैनिक १७ हजार ६ सय ८६ जना कोरोना संक्रमित भएको देखिएको छ ।

फेब्रुवरी ९ तारिखसम्ममा कोरोना भाइरसको लागि सकारात्मक निदान गरिएको र हेरचाह प्राप्त गर्नेहरूको कुल संख्या गत हप्ताको तुलनामा ३० हजारबाट बढेर १ लाख ६९ हजार ६ सय ९७ जना पुगेको छ ।

 

प्रत्येक ८० जना टोकियोबासीमा एक जनाले अस्पतालमा वा आवासमा वा घरमा उपचार पाइरहेको एक विज्ञको दाबी छ । टोकियोमा मात्र बिहिबार १८ हजार २ सय ८७ नया संक्रमित भेटिएका थिए । भने देशव्यापी रूपमा ९९ हजार ६ सय ९४ जना नया संक्रमित हुदा १६४ जनाको कोभिड-१९ का कारण मृत्यु भएको थियो ।