जापान प्रवेश गर्नेहरुको क्वारन्टिन घटाएर अब ३ दिन !

 

 

जापानले देशभित्र प्रवेश गर्नेहरुको क्वारन्टिन अवधि हालको ७ दिनबाट घटाएर ३ दिनमा ल्याउने विचार गरिरहेको छ । सीमा नियन्त्रण खुकुलो बनाउने प्रयासअन्तर्गत सरकारले यसो गर्न लागेको भन्दै बुधबार सरकारी स्रोतहरुले बताएका हुन् ।

 

मार्चदेखि नै शुरु हुने गरी सरकारले दैनिक नव आगन्तुकको आगमनमा लगाएको सीमा पनि अहिलेको ३ हजार ५०० बाट बढाएर ५००० मा पुर्याउने स्रोतले बताएको छ ।

 

सरकारले दैनिक सीमाभित्र रहेर घुमफिर बाहेक अन्य प्रयोजनका लागि आउन चाहनेहरुलाई स्वीकार गर्न थाल्ने अपेक्षा गरिएको छ । जापानमा कोरोना भाइरसको संक्रमण फेब्रुअरी उत्कर्षमा पुगिसकेको हुन सक्ने बुधबार स्वास्थ्य मन्त्रालयको कोभिड–१९ सम्बन्धी सल्लाहकार समितिका प्रमुख ताकाजी वाकिताले भनेका छन् ।

 

यद्यपि सतर्क भने रहनु पनि उनको भनाइ छ । जापानले संक्रमण नियन्त्रण गर्न गैर आवासीय विदेशी नागरिकहरुमा प्रवेशमा रोक लगाउँदै आएको छ । सरकारको सो नीतिका कारण कम्पनी देखि विद्यार्थीहरुसम्म सबैले सीमा नियन्त्रण अति नै कठोर भएको भन्दै अन्तरराष्ट्रिय स्तरमा समेत जापानले आलोचना खेप्नु परेको छ ।

 

कोरोना भाइरसको संक्रामक प्रकार ओमिक्रोन भ्यारिएन्ट फैलिन नदिन जापानले नोभेम्बरको अन्त्यदेखि सीमा नवप्रवेशी विदेशीका लागि ठप्प पारेको छ । त्यसयता सीमित संख्यामा अपवादको अवस्थामा मात्रै विदेशीहरुलाई प्रवेशको अनुमति दिइएको छ ।

 

सो प्रतिबन्ध कम्तिमा पनि फेब्रुअरीको अन्त्यसम्म कायम छ । पछिल्लो समय जापानी अधिकारीहरुले ओमिक्रोनका कारण सीमामा गरिएको कडाई शुरुमा कति खुकुलो बनाउने भन्नेबारे छलफल गर्न थालेका छन् ।

 

अपेक्षित परिवर्तन गरियो भने तेस्रो दिनमा कोभिडको परीक्षण नकारात्मक आएका व्यक्तिहरु घर वा अन्य बसोबास स्थलमा सेल्फ–क्वारन्टिनमा रहन सक्ने स्रोतले बताएको छ ।

नव प्रवेशीहरुले तोकेका शर्त वा आवश्यकताहरु पुरा गरेको पाइएमा क्वारन्टिन नै खारेज हुने सम्भावना बारे पनि स्रोतहरुले औंल्याएका छन् ।