जापानद्धारा नयाँ भिषा बाहकलाई फेब्रुवरी ७ बाट 'फाष्ट ट्रयाक' प्रवेश घोषणा

 

टोकियो, जापान ।

जापान सरकारले कोभिड महामारिका कारण अवरुद्ध अवस्थामा रहेको नयाँ भिषा बाहकको प्रवेशलाई छिटो र छरितो तरिकाले प्रवेश खुलाउन थालेको छ ।

प्रवेशलाई सहज बनाउन स्वास्थ्य, श्रम तथा कल्याण मन्त्रालयले फेब्रुवरी ७ तारिखबाट 'फाष्ट ट्रयाक' प्रणाली लागू गर्ने घोषणा गरेको छ ।

मन्त्रालयका अनुसार जापानको कडा प्रवेश नीतिका कारण प्रवेश समस्या व्यहोरिरहेकाहरुले छिटो छरितो तवरमा जापान प्रवेश गर्न अब कान्साई बिमानस्थल प्रयोग गर्न सक्नेछन् ।

स्वास्थ्य मन्त्रालयले जारी गरेको 'फाष्ट ट्रयाक' प्रणाली अनुसार जापानको विमानस्थल ओर्लेपछि 'स्मार्टफोन'मा राखिने 'एप्लिकेशन'कै माध्यमबाट 'क्वारिन्टिन' नियमहरु तथा प्रकृयाहरुबारे पूर्ण जानकारी र प्रक्रिया अपनाउन सक्नेछन् । यसबाट जापान प्रवेश पूर्व 'क्वारिन्टिन' लगायतको पूर्व व्यवस्था गरेर मात्र आउनुपर्ने बाध्यताका कारण प्रवेश नपाएका विद्यार्थीहरुलाई सहज हुनेछ । साथै रोजगार एवं प्रशिक्षार्थी कामदारको रुपमा आउन लागेकाहरुले समेत तुलनात्मक रुपमा सहज प्रवेश पाउनेछन् ।

जापानले हालको लागि नयाँ भिषा बाहकको जापान प्रवेशमा नीतिगत रुपमा फेब्रुवरी अन्त्यसम्म रोक लगाएको छ । तर विशेष परिस्थितिहरुमा छुट दिंदै आएको जापानले हालैका हप्ताहरुमा सिमित 'भिषा स्टाटस' भएकाहरुलाई प्रवेश खुलाउन थालेको छ ।

स्वास्थ्य मन्त्रालयका अनुसार तत्कालका लागि फेब्रुवरी ७ बाट 'फाष्ट ट्रयाक'को नियम ओसाका स्थित कान्साई अन्तर्राष्ट्रिय बिमानस्थलमा मात्र लागू गरिएपनि मार्चबाट प्रवेश सुचारु भएमा नारिता, हानेदा, चुबु र फुकुओका स्थिति बिमानस्थलबाट पनि यस्तै प्रकारको 'फाष्ट ट्रयाक' विधि अपनाईनेछ ।