जापानले विदेशी कामदारको तथ्यांक संकलन गर्ने

 

 

टोकियो, जापान ।

जापान सरकारले आर्थिक वर्ष २०२३ मा यहाँ काम गरिरहेका विदेशीहरुको डेटा संकलन गर्न नयाँ सर्वेक्षण शुरु गर्ने भएको छ । उनीहरुको आय र कामको प्रकार लगायत जानकारी लिने उद्देश्यले सो सर्वेक्षण शुरु गर्न लागिएको हो ।

पछिल्लो समय जापानमा विदेशी कामदारहरु विशेषगरी प्राविधिक प्रशिक्षार्थीहरुमाथि दूरव्यवहारका घटनाहरु सार्वजनिक भइरहेकै समयमा सरकारले विदेशी कामदारलाई टेवा दिन यो सर्वेक्षण गर्न लागेको हो ।

गत वर्षको अक्टोबरसम्ममा जापानमा विदेशी कामदारको संख्या १७ लाख ३० हजारको कीर्तिमानी उचाईमा उक्लिएको श्रम मन्त्रालयको तथ्यांकले देखाएको छ । तर सरकारसँग उनीहरुका आवासीय हैसियत, राष्ट्रियता र कार्यस्थलको आकार जस्ता सामान्य जानकारी मात्रै छ ।

सरकारलाई विदेशी कामदारहरुले काम गर्ने वास्तविक अवस्था थाहा नभएकोले उनीहरुलाई पर्याप्त टेवाका उपायहरु ल्याउन नसकेको भन्दै आलोचकहरुले औंल्याइरहेका छन् ।

डेटा संकलनको ठोस योजना आर्थिक वर्ष २०२२ भित्र तयार पारिनेछ । सर्वेक्षण भने त्यसपछिको आर्थिक वर्षमा हुनेछ । जापानी नागरिकहरुको श्रम तथ्यांकसँग तुलना गर्न मिल्ने गरी यो डेटा संकलन गरिने श्रम मन्त्रालयले बताएको छ ।

फेब्रुअरीमा विज्ञहरुको समितिले परिकल्पना गरेको सर्वेक्षणसम्बन्धी अन्तरिम प्रतिवेदनमा भने सर्वेक्षणले शुरुमा प्राविधिक प्रशिक्षार्थी लगायत विदेशी कामदार भर्ना गर्ने कार्यालयहरुलाई समेट्ने बताइएको थियो ।

यसमा विदेशी कामदारहरुलाई उनीहरुको आय, कामको प्रकार र कार्य समय जस्ता अन्य प्रश्नहरु सोधिनेछ । प्रश्नावलीमा उमेर र लिंग जस्ता आधारभूत कुरा बाहेक कामदारको जापानी भाषामा दक्षता, मातृ भाषा, बसाईको अवधि, उनीहरुले पठाउने गरेको विप्रेषणको आकारआदि बारे पनि प्रश्नहरु हुनेछ ।